Jer 9 | NdeIBE | STEP | Awu, sengathi ngabe ikhanda lami lingumthombo wamanzi lamehlo ami umthombo wezinyembezi! Kade ngizakhala emini lebusuku ngikhalela abantu bami ababuleweyo.

Jeremiah 9

1 Awu, sengathi ngabe ikhanda lami lingumthombo wamanzi lamehlo ami umthombo wezinyembezi! Kade ngizakhala emini lebusuku ngikhalela abantu bami ababuleweyo.

2 Awu, sengathi ngabe enkangala ngilendawo engahlala izihambi, ukuba ngisuke ebantwini bami ngibatshiye; ngoba bonke bayizifebe, ixuku labantu abangathembekanga.

3 Benza izindimi zabo zilunge njengedandili ukuba batshoke amanga; ukuthi bayanqoba elizweni akusikho ngeqiniso. Basuka kokunye ukona baye kokunye; kabangamukeli,” kutsho uJehova.

4 “Qaphela abangane bakho; ungabathembi abafowenu. Ngoba wonke umfowenu ungumkhohlisi; njalo wonke umngane ungumhlebi.

5 Umngane ukhohlisa umngane, njalo kakho okhuluma iqiniso. Sebafundisa izindimi zabo ukuqamba amanga; bayazidinisa ngokona.

6 Lihlala phakathi kwenkohliso; ngenkohliso yabo bayala ukungamukela,” kutsho uJehova.

7 Ngakho uJehova uSomandla uthi: “Khangelani, ngizabacolisa ngibahlole, ngoba kuyini okunye engingakwenza ngenxa yesono sabantu bami?

8 Ulimi lwabo lungumtshoko olobuthi, lukhuluma inkohliso. Lowo lalowo ukhuluma kuhle ngomlomo wakhe lomakhelwana wakhe, kodwa enhliziyweni yakhe emthiya ngomjibila.

9 “Kakufanele ngibajezisele lokhu na?” kubuza uJehova. “Kakufanele ngiphindisele esizweni esinjengalesi na?”

10 Ngizakhala ngililele izintaba njalo lamadlelo asenkangala ngizawenzela isililo. Atshabalele njalo kakho ohambela kuwo, lokubhonsa kwezinkomo akuzwakali. Izinyoni zasemoyeni sezibalekile lezinyamazana kazisekho.

11 “IJerusalema ngizalenza libe yinqumbi yonxiwa, isikhundla samakhanka; njalo ngizawadiliza amadolobho akoJuda ukuze kungabi khona ohlala kuwo.”

12 Nguwuphi umuntu ohlakaniphileyo ukuba akuzwisise lokhu? Ngubani ofundiswe nguJehova ongakuchaza? Kungani ilizwe litshabalalisiwe lachithwa njengenkangala ukuze kungadluli muntu kulo?

13 UJehova wathi, “Kungenxa yokuthi sebelahle umthetho wami engababekela wona; kabangilalelanga lomthetho wami kabawulandelanga. 14 Esikhundleni salokho, bona balandele ubulukhuni bezinhliziyo zabo; balandele oBhali, njengokufundiswa kwabo ngoyise.” 15 Ngakho-ke, uJehova uSomandla, uNkulunkulu ka-Israyeli uthi: “Khangelani, abantu laba ngizabadlisa ukudla okubabayo ngibanathise lamanzi alobuthi.

16 Ngizabahlakazela ezizweni bona kanye laboyise abangazange bazazi, njalo ngizabalandela ngenkemba ngize ngibaqede du.”

17 UJehova uSomandla uthi: “Cabangani khathesi! Bizani abesifazana abalilayo beze; libize labo abalobuciko obumangalisayo.

18 Kabeze ngokuphangisa bazesililela amehlo ethu aze ehlise izinyembezi lamanzi ageleze ephuma enkopheni zethu.

19 Ilizwi lokukhala liyezwakala livela eZiyoni lisithi: “Yeka kunganani ukuchithakala kwethu! Yeka ubukhulu behlazo lethu! Kumele sisuke elizweni lethu ngoba izindlu zethu zidiliziwe.’ ”

20 Khathesi, lina abesifazana, zwanini ilizwi likaJehova, vulani izindlebe zenu lizwe amazwi omlomo wakhe. Fundisani amadodakazi enu ukulila; lifundisane amazwi okukhala.

21 Ukufa kukhwele kwangena ngamawindi ethu njalo kungenile lasezinqabeni zethu; sekususe abantwana emigwaqweni kanye lamajaha ezindaweni zikazulu.

22 Tshono uthi, “UJehova uthi, “ ‘zidumbu zabafileyo zizalala njengezibi egangeni, lanjengamabele aqunywe ngemuva kovunayo, okungekho ozawabutha.’ ”

23 UJehova uthi: “Ohlakaniphileyo kangazincomi ngokuhlakanipha kwakhe loba indoda elamandla izincome ngamandla ayo loba indoda enothileyo izincome ngenotho yayo,

24 kodwa lowo ozincomayo kazincome ngalokhu: ukuthi uyaqedisisa njalo uyangazi, ukuthi mina nginguJehova, osebenzisa umusa, imfanelo lokulunga emhlabeni, ngoba lezizinto ziyangithokozisa,” kutsho uJehova.

25 UJehova uthi, “Izinsuku ziyeza, lapho engizabajezisa khona bonke abasoke enyameni kuphela – 26 iGibhithe, loJuda, lo-Edomi, lo-Amoni loMowabi labo bonke abahlala enkangala ezindaweni ezikhatshana. Ngoba izizwe zonke lezi kazisokanga, njalo lendlu yonke ka-Israyeli kayisokanga enhliziyweni.”